Nokia喺稍早時間就推出咗入門手機Nokia G20，就等我同大家介紹下！
Nokia G20採用6.5吋HD+水滴屏幕，並配備聯發科曦力G35處理器，預載Android 11系統。佢機身設有可用作指紋辨識器嘅開關鍵同Google Assistant鍵，亦支援臉部辨識、雙卡雙待同藍牙5.0功能等等。
喺鏡頭方面，Nokia G20有800萬像素嘅前置鏡頭，而後置四鏡頭就由4800萬像素主鏡頭、500萬像素超廣角鏡頭、200萬像素微距鏡頭同景深鏡頭組成。作為入門機有咁好嘅鏡頭，真係唔錯！
呢部機擁有5050mAh嘅大電量，支援10W充電，Nokia就話電池續航力可以長達3日，咁應付日常生活絕對綽綽有餘喇！Nokia更會為呢部手機提供3年嘅每月安全性更新同2年嘅系統更新，保障用家。
Nokia G20喺香港已經上市，4GB RAM + 128GB內置儲存空間版本賣HKD$1,798，有亮藍同亮白兩款色。如果遲啲想睇埋Nokia G20嘅開箱同試用嘅話，就記得繼續留意我哋喇！
